Science leh Maths-a ti ṭhate chawimawi

SCERT chuan nimin khan an auditorium-ah Science leh Mathematics-a tiṭhate chawimawina an buatsaih a, School Education minister Lalchhandama Ralte-in hmanpuiin, zirlaite chu an thiamna leh theihna ram tana hmang ṭangkai ngei turin a chah.

Incentive Cash Award for Proficiency in Science & Mathematics hi kum 1978-ah sem ṭan a ni a, kumina sem hi vawi 45-na a ni. Kuminah mi 86-in lawmman an dawng a, HSLC aṭangin mi 66 leh HSSLC aṭangin mi 20 an ni.

Pakhatna lawmman dawngte'n full mark 100 an hmu a, pahnihna dawngte'n mark 99 leh pathumna dawngte'n mark 98 an hmu a ni.

School Education minister chuan, union territory hun laia high school-a science leh mathematics zirtirtu tur an awm mang loh laiin, tunah chuan lâk sèn loh an awm tawh tih a sawi a, "Zirlaibute hi Mizo zirlaite'n mahni ṭawng ngeia an thiam theih nan bilingual textbook siam niin, peih ṭêp a ni a, pawl 9 leh 10 zirlaibu aṭangin bul ṭan a ni dawn," a ti.

Science leh mathematics-a tiṭha lawmman dawngtute chu Mizoram hmun hrang hranga mite an nih thu sawiin Lalchhandama Ralte chuan, "Hei hian tlang hrang hranga zirtirtute'n lawmman hmu tur an chher chhuak thei a, zirlaite pawhin an tlin vek tih a lantir a ni," a ti a; hmun hrang hranga zirlaite chu incentive cash award dawng thei an ni tih hriaa ṭan la turin a chah.

Chawimawina inkhawmah hian School Education, SCERT, MBSE leh Samagra Shiksha officer te, lawmman dawngtu zirlaite bakah, principal/headmaster-te leh zirlai nu leh pate an tel a; School Education secretary Dr Lalzirmawia Chhangte-in Science Laboratory Manual a tlangzarh a ni.