ZPM sorkarah hmasawnna a kài rual dawn - ZPM Working President

ZPM working president K Sapdanga chuan, ZPM sorkarah hmasawnna a kài rual dawn thu leh, khua leh tui dik takte chu ZPM-in a thlauhthlak a thian loh thu a sawi.

K Sapdanga hian nimin khan Damparengpui YMA Hall-a ZPM Mamit West Block thar a hawnnaah thu sawiin, kum 2018 inthlanah remchan lohna avangin hnam tlém zawngte tamna bialah candidate an nei thei lo tih a sawi a, "ZPM dan buah chuan India mi dik tak, kum 18 tling chin, ZPM thil tum pawm apiangte chu member an ni thei tih a ni. Khua leh tui dik takte tumah ZPM-in a thlauhthla thiang lo. ZPM thil tum bulpui chu ram rorelnaa Pathian ram tun din a ni," a ti.

Mizoram hmun hrang hrangah hnam hrang hrang awmna bik, inhlâwm khawmna bik a awm tih sawiin Sapdanga chuan, "Zêp thu a chêng lo, eng emaw cháng chuan ram rorelna fel lo avangin kan inhmelma en lek lek ṭhin. Democracy ramah tute emaw an inlulin viau chuan rorelna fel lo vang a ni," a ti a; chungte chu a siamṭhatu, ṭhelhdaitu, hmasawnna sem rualtu tur sorkar rorelna fel a awm a ngaih thu a sawi.

K Sapdanga chuan, rorel theihna tur leh lal theihna tura mi dangte infuihpawrh chu Pathian duh zawng a ni lo tih sawiin, "Kan ṭawng a hrang emaw, ramri hrûla awm kan ni emaw, ZPM sorkarah chuan hmasawnna hi a kái rual dawn a, kan rilruah ngaihṭhat lohna awm suh se. ZPM chuan tu mah huat kan duh lo, he ramah hian thlamuang takin chengho ila, dan hnuaiah kan chanvote chang tlang u kan ti a ni," a ti.

Minority-te sorkarin a enkawl dan chu a sakhua lo hle nia sawiin Sapdanga chuan, "ZPM sorkarah chuan dan a lal ber ang a, mi dikte an zalen ang," a ti a; ram thlamuanna atana ZPM thuchah chu keng darh turin a chah.

ZPM Working President chuan, sorkar laipui aṭanga sum lo kalte chu a hmanna tur dik taka hman ni se chuan daihzâi tham a nih thu sawiin, "Kan sorkar hrawn mek hian duh zah zah hai ṭhen a, vote zawn nan SEDP tih leh ringawt ṭhinte hi a fel lo hle. Budget hi contract vaibelchhe tél nena chawm pawlh chi a ni lo," a ti bawk.