Mizoram sorkarin zangnadawmna pek tur sum a tibuai - Duhoma

ZPM leader Lalduhoma chuan, national highway kawngpui zauhnaa zangnadawmna pek tur sum pek tura peih diam tawh chu tibuaiah leh zangnadawmna sum ei ve phêt tumah Mizoram sorkar a puh.

Lalduhoma hian nimin khan Vairengte Multi­purpose Hall-ah thu sawiin, NH kawngpui zauh tura zangnadawmna pek tur sum chu NHIDCL-in a dah fel tawh thu a sawi a, "Compensation sum hi Mizoram sorkar sum a ni lo a, NHIDCL sum a ni. Pawisa peih diam tawh chu kan sorkar hian he lai hi forest ram a ni tiin a sawi buai a, mipuiah harsatna a siam hi a pawi kan ti hle. Compensation sum sorkarin ei ve phêt a lo tum ringawt hi a zahthlak a, a pawi kan ti tak zet," a ti.

Zangnadawmna dawng hmasa ho pawh sorkarin 15% a laksak tawh tih sawiin, Duhoma chuan, "Court-in pe tura a tih hnuah chauh a pe chhuak che u a nih kha. 15% ei ve a duh avangin kha dan kha siamṭhain, dan thar a siam leh a ni," a ti a; ram lak chungchangah state-in dan a siam ve phal a nih rualin, Mizoram state dan siam chuan mipui a hrêk thu a sawi.

ZPM Leader chuan, Mizoram tidam turin Pathianin mi tláwm tê tê a ruat nia an ngaih thu sawiin, “Kan rama party pahnih Congress leh MNF-te hi hunin a liam pui mek zel a, a ral zawnga kal chu an ral chak em em a, a pung tura kal chu an pung chak em em a ni," a ti a; party sorkar nuai boa mipui sorkar siam turin ZPM chu ram maichàmah an inhâl ral a ngaih thu a sawi bawk.

ZPM hruaitute hian NH-6 zauh tura an ṭhen dan a hmunah an enfiah nghal a; ZPM-ah mi 736 a lâwm lut niin ZPM thuchhuah chuan a tarlang.