Zangnadawmna pe thuai turin phût

Congress ṭhalaite chuan thuchhuah siamin, Congress sorkar laiin zangnadawmna pek chungchangah harsatna lian tham a awm ngai lo niin an tarlang a; NH no. 6 leh 306 zauhna atana ram lâk tur neitute hnenah zangnadawmna pe thuai turin NHIDCL

an phût.

MPYCC chuan, National Highway no. 6 leh 306 thlúr li (four lane) ni tura zauhna turah, harsatna hrang hrang vanga hmalak theih loh leh ram neitute hnena zangnadawmna pek loha a awm reng chuan ram hmasawnna tur a tiṭhuanawp tih an tarlang a, "Tikhawmuang loa tihfel ngaite tifel thuai tur leh kawngpui sial hna thawk thuai turin NHIDCL kan phût tak zet a ni," an ti.

Congress ṭhalaite chuan, "Mizoram sorkarin dan hman tlak tawh loh hmanga ram neitute ram hlutna a ît emaw tih tur hi a vanduaithlak a, thluaka sum lut syndrome dik takah kan ngai," an ti a; ram neitu dik takte'n an ram hlutna an hmuh let chu an chanvo a nih avangin an hmuh ngei an duhsak thu sawiin, chutianga hma la tur chuan thuneitute an ngen a ni.

MPYCC chuan, Congress sorkar laiin rél kawng kalna turah zangnadawmna chungchangah ram neitute'n buaina lian tham an tâwk lo a, tluang takin zangnadawmna an la thei tih an sawi a, "Tuna MNF sorkar hnuaiah land owner-te'n buaina an tâwk nasa em em thung a ni," an ti.