Dragon fruit hlawhtlinnain sorkar a chawimawi - MLA Nunmawia

Thenzawl Dragon Fruit Grower's & Marketing Society chuan November 8, Thawhlehni khan General Assembly hmasa ber an hmang a, khuallian Horticulture Development Board vice chairman Prof. F Lalnunmawia, MLA chuan, Dragon fruit hlawhtlinnain sorkar a chawimawi niin a sawi.

Prof. F Lalnunmawia chuan, "MNF sorkar flagship programme SEDP pilot project zinga dragon fruit hlawhtlinnain sorkar a chawimawi a, sorkar pawhin a market a ngaihtuah zel dawn. Kan sorkarin kut hnathawktute dâwm kânna tura flagship programme a ruahman SEDP hlawhtlinna kan hmu chho mek zel a ni," a ti.

Thenzawl Dragon Fruit Grower & Marketing Society hian June 2020 aṭangin hma an la ṭan a, chhungkaw 54-in hma an la mek. Dragon fruit chìnna atan scheme hrang hrang - FOCUS, MIDH leh SEDP aṭangin ṭanpuina pek a ni a, SEDP sum nuai 80 hmangin a panna kawng laih a ni.