KHAWTHLIR

HBC-in thisen pe
Hrangbana College NSS unit chuan nimin khan an collage hall-ah thisen pek an huaihawt a, Civil Hospital, Aizawl tan thisen unit 56 an pe a, petute mipa 35 leh hmeichhia 21 an ni.

FLAM leh PC party
Former Legislator Association of Mizoram (FLAM) hruaitute chu nimin khan PC party pisaah an lêng a, PC hruaitute nen an inkâwm. FLAM hruaitute hi vice president Dr JV Hluna leh treasurer Rochhunga Ralte an ni a; Mizoramah inthlanna thianghlim leh muanawm tak a awm theih nana thawhhopuiah PC hruaitute an sáwm a ni.

Larsap nen inkâwm
Governor Hari Babu Kambhampati leh Shri Ramachandra Medical College (SRMC), Chennai aṭanga lung doctor lo kalte chu nimin khan Raj Bhavan-ah an inkâwm. Doctor lo kalte hi cardiologist leh cardiac surgeon an ni a, November 10-12, 2022 chhungin Lunglei Civil Hospital-ah free clinic an nei dawn a ni.

Tanker kâng vanga thi awm belh leh
October 29, 2022 tlaia Tuirial Airfield Venga tank lorry kânga kâng zinga mi C Zonunmawia (61), Airfield Veng chu nimin tlai dar 3 khan a kâng hliam tuar loin damdawi-inah a thi a, vawiinah vui a ni ang. Heti hian tank lorry chesuala kâng ta avangin mi pali an thi nghal a, a hnuah mi dang pali thi leh tawhin, mi pariat an thi ta a ni.

Kuhva phurh khap
Kolasib district magistrate John LT Sanga chuan, Kolasib district-ah dan loa kuhva rah phurh luh khap a nih thu leh an district chu dan loa kuhva phurhna kalkawngah hman khap a nih thu a puang. Thupek hian ni 60 chhung a huam dawn a, dan bawhchhiate chu IPC Section 188 hmanga hrem theih a ni.

Hmeichhe dan zirho
Lunglei District Legal Services Authority leh Full Life Access Trust chuan nimin khan Lungleia Excise & Narcotics department conference hall-ah MHIP Sub-Hqrs, Lunglei hnuaia MHIP branch hruaitute leh Lunglei khawpuia anganwadi worker-te tan hmeichhe kaihhnawih dan zirna an buatsaih. Zirhona hi National Commission for Women-in a ruahman anga buatsaih a ni.