District 4-ah chiah hripui vei an awm

November 8, Thawhlehni khan Mizoramah Covid-19 vei mi pali hmuh chhuah a ni a, nimin khan hripui vei dam tawh mi 16 an chhuak a, thi an awm lo. Nimin tlai khan district pali-ah chiah Covid-19 positive an awm.

IDSP aṭanga thu dawn danin, Thawhlehnia Covid-19 positive hmuh chhuahte chu Lunglei leh Saitual district-a mi pahnih ve ve an ni a; swab samples 53 endik niin, positivity rate chu 7.55% a ni.

Mizoramah swab sample 19,89,579 endik tawh niin, Covid-19 vei 2,38,883 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,121 (99.68%) chhuahtir an ni tawh a, mi 726 (0.30%) thi tawhin, enkawl mek mi 36 (0.02%) an awm.

Nimin tlai dinhmun angin, Mizorama district 11 zinga pali - Aizawl, Lunglei, Mamit leh Saitual district-ahte chiah hripui vei an awm a; district dang pasarih - Siaha, Champhai, Kolasib, Serchhip, Lawngtlai, Khawzawl leh Hnahthial district-ahte an awm tawh rih lo a ni.