MUP-a léngkhawm zai thiam ber Bungkawn

Art & Culture department leh MUP General Headquarters-in Aizawla MUP branch-te tana October thla chhunga Lengkhawm Zai Intihsiak an buatsaih chu nimin khan Vanapa Hall-ah khâr a ni a, Social Welfare minister Dr K Beichhuaa'n a hmanpui. Intihsiakah hian MUP, Bungkawn Branch pakhatna an ni.

Lengkhawm Zai Intihsiak hi October 2022 chhungin Aizawla hmun hrang hrangah buatsaih a ni a, area 13 aṭangin MUP branch 50 an tel. Area 13-a aṭanga pakhatna ṭheuhte chu nimin khan Vanapa Hallah an intihsiak leh a, MUP member 609 an tel.

Intihsiakah hian Bungkawn Branch pakhat na niin, Rs 30,000 an dawng a; pahnihna Ramhlun Vengthar Branch-in Rs 2,0000 leh pathumna Ramthar Veng Branch-in Rs 15,000 an dawng.

Khuangpu ṭha berah Vanlalfela Khiangte leh Kapchhunga, Bungkawn Branch leh, hla hril thiam berah Lianthangpuii, Ramthar Veng Branch thlan an ni a; member kal ṭha ber chu Chawnpui Branch (member 60) an ni. Intihsiaka tel zinga upa ber Hrangauva, Bawngkawn South leh Khawpuithangi, Ainawn Veng, kum 94 mi ve ve hnenah Art & Culture Director Special Award hlan a ni bawk.

Minister Dr K Beichhua chuan, upate chu hnam zahawmna kengtu an nih thu a sawi a, "MUP-in lengkhawm zai intihsiak a buatsaih hian Mizo hnam ro hlu kan léngkhawm zaite humhalh a ṭulzia min hriat thartir a, sak dan dik te, a nihna dik takte hi ṭhangtharte'n kan hriat theihna tura buatsaih a ni hi a lawmawm tak zet,” a ti.