Campus pek phûtin zirlaiin kawng an dang ; Chief Minister-in ti tura min tih bawhzuiin kan campus tur ram kan teh tawh - GANC SU

Govt. Aizawl North College (ANC) zirlaite chuan nimin khan an college awmna hmun, Ramhlun North-ah kawngpui an dang. ANC Students Union (SU) hruaitute chuan, chief minister Zoramthanga'n ti tura a tih angin an college hmun tura an hual Falkland Vengah ram an teh zo tawh tih sawiin, "Kan teh hnuah amah hmuh kan tumin appoinment min pe duh tawh lo," an ti.

ANC zirlaite hi nimin chawhma dar 10 vel aṭangin an college bul kawngpui sirah campus pe tura sorkar nawr nan an ṭhukhawm a, sorkar aṭanga thu dawn an neih loh avangin chawhnu dar 1:30 vel aṭangin kawngpuiah ṭhutthleng dahin an ṭhu a ni. Hei vang hian kawngpuiah lirthei a kaltlang thei lo a; magistrate hoin police eng emaw zat awm mah se, zirlaite hnawh darh an tum lo.

Tlai dar 3 velah ANC SU hruaitu te, Mizo Students' Union hruaitu te, magistrate leh police hotute an ṭhukhawm a, inremna mumal an siam thei lo. Chumi hnuah zirlai hruaitute an ṭhukhawm ve leh a; SU hruaitute chuan an rorelte zirlaite hmaah puangin, tlai dar 3:30 velah kawngpui dan an titawp a ni.

Students Union hruaitute chuan, Chief Minister zin zuitu Guwahati-a awm mek CM Private Secretary nen an inbiak thu an sawi a, "Ani chuan kan ram tur chungchang file chu GAD-ah a awm mek thu a rawn sawi. 

Keini chuan kan ram tur hi min pe ngei a ni tih ziaka kan hmu a nih loh chuan lungawi mai kan tum lo. Zaninah kan beisei ang kan hmu lo a nih chuan naktukah hma kan la chhunzawm ang," an ti.

ANC zirlaite chuan mipui tibuai zawnga hmalak chu an duh dan a nih bik loh thu sawiin, "Loh theih lohna avangin tun dinhmun hi kan thleng, sorkarin min nawr lui a ni ber. Mipui hriatthiamna kan ngen tak meuh a ni," an ti a; an college awmna veng neitu Ramhlun North mipui chungah an lawm thu an sawi.

Kawngpui danna hmunah hian college hrang hranga SU hruaitute pawh an kal a, ANC chu an thlàwp tlat thu leh a ṭul anga an puih zel tur thu an sawi hlawm. ANC hian an beisei ang thu lawmawm an dawn loh chuan vawiin hian Aizawlah kawngzawh an tintuah a ni.

ANC chuan thuchhuah siamin, college building leh ram chungchangah Chief Minister bakah UDPA Minister leh Higher & Technical Education Minister-te pawh an hmuh fo tawh thu an tarlanga, "Bethlehem Vengthlanga sahuan hmun hlui te, DIET ram ṭhenkhatte leh LAD office building-te pawh sorkarin min pek theih mai tur thute min kawh hmuh tawh a ni," an ti.

ANC tarlan danin, an ram beiseite a hlawhchham vek hnuah Chief Minister hmuh nawn leh niin, Falkland Venga RAY building thlang, UDPA ram
ruak a lo kawhhmuh a ni. Hemi bawhzuia hma an lak buai hnuah Chief Minister hian appoinment a pe thei tawh lo.

ANC SU HRUAITUTE THUSAWI
 Kum hnih chhungin kan Chief Minister ṭum 10 vel kan hmu.
 CM hmuh hnuhnun ber October 2022 tìrah kan ram duh Falkland Venga mi chu kan zirtirtu, Falkland Veng LC leh engineer-te nen teh turin min ti.
 CM kan hmuh hnuhnun ber ṭum hian ram kan teh zawha a hoa sawiho leh vat a nih tur thu min hrilh.
 Ram kan teh zawhah appointment kan dil a, CM hian min pe thei lo.
 A tàwpna atan October 28 khan CM-ah appointment kan dil leh a, Falkland Veng LC-in college campus atana ram pek min remtihna leh kan ram tehna dinhmun kan thil tel.
 CM appointment kan dil hnuhnun ber hian November 4, 2022 thleng kan ngaihchàn tur thu kan ziak tel a, chhànna kan dawng lo.
 Kan college-ah kan leng tawh lo a, class inkal chhâwkte a ngai. Chu bakah, kan college bul market chungah class-te kan kal a, nakkumah kan hmang chhunzawm thei dawn lo.