BJP-in Chawngte-ah kawng an zawh

Chakma Autonomous District Council (CADC) chhunga BJP-te chuan chhan hrang hrang vanga CADC-a sorkar an duhkhawp lohna lantirin nimin khan Chawngte (Kamalanagar)-ah kawng an zawh.

CADC BJP District Committee huai hawt a kawng zawh hi Kamalanagar I-a traffic point bulah ṭan a ni a, Chawngte SDO(Civil) pisa kawt thleng an kal. Kawngzawh tàwpnaah memorandum an siam a, Mizoram G overnor hnena  thehluh turin Chawngte SDO(C) hnenah an hlan a ni.

BJP memorandum-ah chuan, CADC-a chief executive member (CEM) Buddha Lila Chakma paihthlak duhtu MNF MDC-te chu November 8, 2022 aṭangin CADC Rest House-ah an inkulh hran thu te, MDC lungawi lote chuan CEM tur mi dang vawrh chhuah an tum thu te, CEM thlak leh a nih chuan sorkar term kal mek kum li leh a chanve chhunga CEM ṭum ruk an thlakna tur a ni tawh dawn thute an tarlang.

BJP-te chuan Governor chu CADC CEM thar ruat tawh lo tur leh, CADC sorkar inrêlbàwlna pawh a kuta hlan zui a nih theih nan CADC-ah Governor's Rule-a puang turin an ngen a; CADC CEM thar awm leh pawh ni se, eirûkna leh hlemhletna a hluar zel tho dawna an ngaih thute an tarlang bawk.