Fare/rate zâwm turin hriattir

State Transport Authority (STA) chuan, passenger phur lirthei neitu/ khalhtute chu sorkarin chuan man (fare/ rate) a siamte ṭha taka zâwm vek turin a hriattir a, sorkarin fare a bithliah aia sanga chuan man late chu dan bawhchhia an nih thu a tarlang.

STA chuan, mipuiin zin veivahnaah harsatna an tawh loh nan STA-in mihring phur lirthei chi hrang hrang permit a pe chhuak ṭhin tih a tarlang a, "Lirthei permit diltute hi sorkar rate zâwm tur te, sorkar phal loh thil phur lo tur te, STA-in tlân tura a tihna hmun apiangah eng hunah pawh tlan turin an intiam vek a ni," a ti.

STA chuan, "Permit hmu reng reng chuan permit an lak chhuah rualin sorkar rate aia sanga chuan man la lo turin thu an intiam thlap a, sorkar thu an zawm loh chuan permit cancel/suspend thleng an inhuam thu an ziak thlap a ni," an ti a; sorkar fare bituk aia sang late chu Mizoram hmun hrang hranga Transport department hotute hnenah hriattir turin mipui an chah a ni.