Kut hnathawktute hi ZPM party-in kan ngaih pawimawh ber an ni - Duhoma

ZPM leader Lalduhoma chuan, kut hnathawktute chu ram innghahna an nih avangin chawikân an nih loh chuan ramin hma a sawn tak tak dawn loh thu sawiin, kut hnathawktute chu ZPM party-in an ngaih pawimawh ber an nih thu a sawi.

Lalduhoma hian November 9, Nilaini zan khan Saiphai khuaa vantlang inkhawmah thu sawiin, "Kut hnathawktute hi kan ram innghahna an ni a, kan chawikân loh chuan kan ramin hma a sawn tak tak dawn lo. Kut hnathawktute hi kan ngaih pawimawh ber an ni," a ti.

Kut hnathawktute chawikân an tum dan sawiin Duhoma chuan, "Research base-in mithiamte ráwn chungin thlai thar kan leisak dawn. Chhung tinte eizawnna a inang vek lo a, kan eizawnna bul ṭanna turin hand holding policy ṭha tak kan nei," a ti a; ṭhalai lehkhathiam, kutkawih eizawnna (entrepreneurship) lama tui tan hmachhawp tam tak an neih thu leh awlsam zawka loan pûk dan tur an siam dawn thu a sawi.

ZPM Leader chuan, Pathian zara sorkarna an chang a nih chuan hmasawnna ruhrel an ngai pawimawh dawn tih sawiin, "Chu'ng zinga pakhat chu power-a intodelh a ni.

Kan sorkar huna kan khuah tur lui panga kan thlang tawh a, ngaih pawimawh bik leh tih hmasak tur pathum kan thlang tawh bawk," a ti a; inkalpawhna kawng ṭha pawh an ngaih pawmawh hmasak tur a nih thu a sawi bawk.

Lalduhoma chuan, tuna Chief Minister ni mek kutah mipuiin Mizoram budget an dah ngam tawh lo nia sawiin, "MNF party hian Krismas vawi khat bak an nei tawh lo tih a hriat. Mipuiin ram roreltuah kan pawm tawh lo tih a lang. Hruaitu lu ber hian a tichhe vek tawh a, ICU-ah an awm mek a ni," a ti.

Tun dinhmunah Congress party aṭangin ram rawngbawl a har tawh nia sawiin Duhoma chuan, "India ram pum thlirin, Congress party tan dinchhuah leh beisei chi a ni rih lo," a ti a; ZPM-ah an theihna leh thiamnate hmanga ram rawngbawlpuiah a sáwm.

Lalduhoma chuan, ZPM chu political party naupang tê a ni chungin Mizoram Assembly House-ah eptu pawl lian ber an nih thu sawiin, "Tunah hian Mizorama political party-ah chuan a insawhnghet ber kan lo ni ta. Ni tinin mi tharin min rawn zawm zel a, Pathian leh mipui zarah sorkarna kan chan ngei pawh kan inring," a ti.

Inkhawmah hian ZPM PAC member TBC Lalvenchhunga pawhin thu a sawi a ni.