Hunpuia bengchheng chungchang sawiho

Aizawl district bawrhsap Dr Lalhriatzuali Ralte kaihhruaiin November 9, Nilaini khan Aizawl SP Conference Hall-ah kohhran, khawtlang leh páwl hruaitute'n Krismas leh kumthar vuakvêta bengchheng (sound system leh noise pollution) chungchanga hmalak dan tur an sawiho.

Ṭhutkhawma tarlan danin, Noise Pollution (Regulation and Control) Rules, 2000 angin, mihring chenna (residential area) bikah zan lamah rî, decibel 45 aia ring siam phal a ni lo a, zan dar 10 hnu lamah puipunna (event) buatsaih turin phalna lâk a ngai.

Meeting- a tel kohhran leh páwl hrang hrang aiawhte chuan, bengchheng chi hrang hrang - hâlpuah, karaoke leh a chhehvela bengchheng leh zan/tlaia bike ri bengchhengte chu mipui tan hnawksak a nih thu an sawi a; damlo, naupang leh upa tawh tana hriselna khawih pawi thei a nih bawk avangin tun aia khauh zawka khap theih ni se an duh thu an sawi bawk.

Aizawl DC chuan, m i p u i t h l à w p n a a n mamawh thu sawiin, kohhran leh páwl hrang hrangte chu an member ṭheuhte'n hunpui thleng turah sorkar thuchhuakte ṭha taka an zawm theih nan hma lakpui turin a ngen a ; zan/tlaiah bengchheng siam ṭhin an awm chuan sorkar thuneitute hnenah hriattir ṭhin turin a chah.

Mizoram Pollution Control Board aiawhte chuan, Mizorama bengchheng chungchanga dan zawm lohna ber pakhat chu veng chhung aurinna (public address system) a nih thu te, dan chuan in chhunga bengchen a khap loh rualin, páwn lamah ri bengchheng chhuahtir a khap tih an sawi a ni.