Aizawlah TROPACON NE neih a ni

Nimin khan Art & Culture Auditorium-ah India hmarchhak huap medical microbiology (parasitology) mithiamte intawhkhawmna, Tropical Diseases of Parasites Conference, 2022 (TROPACON NE 2022) buatsaih a ni a, Health & Family Welfare minister Dr R Lalthangliana'n a hawng.

Conference hi Zoram Medical College-a Department of Microbiology leh Indian Academy of Tropical Parasitology (IAPT) North East Chapterte buatsaih a ni a, thupui chu 'Emerging & Re-emerging Tropical Parasitic Diseases' tih a ni.

Minister Dr R Lalthangliana chuan, natna hrik hrang hrang zirna, mircrobiology leh chumi hnuaia péng parasitology chu a pawimawh viau a rin thu leh Mizoram TROPACON NE a thleng chu a hlâwkpui ngei a beisei thu a sawi.

Conference hawnna inkhawm hi ZMC director Dr John Zohmingthanga’n a kaihruai a; mithiam hrang hrangin thu an sawi. Hmarchhak state-a medical college hrang hrang bakah, ZMC, Mizoram University, College of Veterinary Science aṭangin mi 53 an tel a ni.