ZPM MLA leh councillor zingah an fund hlêp ru an awm lo - ZPM Ṭhalai President

ZPM Ṭhalai Executive Committee member-te chuan nimin khan Mosia Picnic Spot-ah political training an nei a; thu sawitu ZPM Ṭhalai president Malsawmzuala Ralte chuan, ZPM MLA leh councillor zingah an fund hlêp ru an awm lo tih a sawi a, ZPM ṭhalaite chu Pathian hriatpui tlaka politics khel turin a chah.

Malsawmzuala Ralte chuan, "Pathian ṭih chunga politics khelh hi kalphung thar chu a ni," tiin, ZPM ṭhalaite chu Pathian hriatpui tlaka politics khel turin a chah a; ZPM party-in belhchian a dâwl hle thu sawiin, "ZPM MLA leh councillor-te hi kalphung thar kalpuitu an nih avangin tu ma'n an fund an hlêp ru lo a ni," a ti.

ZPM MLA leh councillor-te'n an fund neih chhun ang ang mipui thleng phâka an hman thu sawiin Malsawmzuala chuan, "Chu chu kalphung thar a ni," a ti a; an fund neih ang ang mipui malsawmna turin a nihna ang taka an hman ṭhin thu a sawi.

ZPM Ṭhalai President chuan, politics páwna an ze pangngai chu politics-a lut turin ṭhalaite a chah a, "Nun pangngaia kan zia leh politics-a kan zia a danglam ṭhin hi thil ṭha lo thentu a ni, nghet takin i ding ang u," tiin ZPM ṭhalai hruaitute a chah a ni.