Dan loa kuhva tawlh dang duh loah BJP-in MNF kaihhruai sorkar an puh

BJP, Mizoram Pradesh chuan thuchhuah siamin, Myanmar aṭanga Mizorama dan loa kuhva tawlh luh dang duh loah MNF kaihhruai Mizoram sorkar an puh a, an dem thu an tarlang.

Mizoram BJP chuan, Myanmar aṭanga dan loa kuhva tawlh luh avangin Mizorama kuhva chíngtute'n an thar chhuah an hralh theih loh phah mek a, cheng tam tak an hloh mek tih an sawi a, "Vawiin thlenga dan loa Myanmar aṭanga kuhva lo lut MNF sorkarin an dang duh lo hi a mak kan ti a, hei hian ram leilung fateah nghawng nasa tak a nei tih an hre duh lo hi a mak kan ti a, a pawi kan ti hle a ni," an ti.

BJP chuan, "Kut hnathawktute harsatna sukiang thei lo sorkar hrawn reng hi a ṭha lo hle a, sorkar din chhan, ram mipui harsatna sutkianpui turin an hlawhchham chiang hle. Mizoram hian sorkar huaisen kan mamawh a, sorkar huaisen kan neihna tur chuan mahni inchâwm zo sorkar neih a ngai thung," an ti a; MNF hruai sorkarin mipui harsatna an sukiang mai dawn lo nia a lan thu an sawi a ni.