KHAWTHLIR

NCC-in thisen pe
Mizorama AIR NCC-te chuan nimin khan NCC din champha vawi 75-na pualin Synod Hospital Blood Bank-ah thisen pek an huaihawt a, mi 28-in thisen an pe a, petute mipa 20 leh hmeichhia pariat an ni.

Meth & heroin man
Aizawla Assam Rifl es-te leh Mizoram Police-a Special Narcotics Police Station-a mite chuan November 8, 2022 khan Sialsukah lirthei pakhat aṭangin heroin gram 342 leh methamphetamine mûm 70,000 an man a; ruihhlo kawltu Sangchunga (37) s/o Thanhawnga (L), Thaltlang leh lirthei khalhtu Lalhlimpuia (22) s/o Lalrodingliana, Sangau Vengthar an tel. Heroin an man chu Rs 1,71,00,000 man a ni a, methamphetamine chu Rs 23,33,10,000 man a ni.

PYD Conference
UPC (NEI) ṭhalai pawl, Pentecostal Youth Department (PYD) General Conference vawi 44-na chu nizan khan Khawzawl Zuchhip Field-ah ṭan a ni a, thupui chu 'I pianna ramah haw leh rawh' tih a ni. Inkhawmpui hi PenNet youtube channel-ah live-a pek chhuah a ni dawn a, November 13, Pathianni zanah a ṭiak ang.

GST zirho
Taxation department chuan nimin khan an auditorium-ah contractor-te tan GST Awareness Campaign an buatsaih a, contractor mi 80 an tel. GST chu ‘One nation One tax’ tih a nih tawh avangin state mal tan duh duha chhiah pek dan kalphung tih danglam emaw, rate tihdanglam emaw theih a nih loh thu tarlan a ni. Taxation hotute chuan, contractor leh sumdawng harsatna neite chu an hnena kal tura chahin, ṭanpui an inhuam reng thu an hrilh.

Free clinic
Lunglei district bawrh sap Kulothungan A chuan nimin aṭanga Lunglei Civil Hospital OPD-a lung leh cancer natna neite tana a thlawna inentirna buatsaih, 'Free cardiology & oncology health camp' a hawng. Health camp hi November 12, 2022 thleng neih tur niin, Medical College and
Research Institute, Chennai leh Cachar Cancer Hospital and Research Centre (CCHRC) aṭanga mithiam 15 lokalte'n damlote an en a ni.