Ni thum awh tur Assembly session ṭan

Mizoram Legislative Assembly pasarihna ṭhutkhawm vawi 14-na, ni thum awh tur chu nimin khan Assembly House-ah ṭan a ni a, session hmasa leh tun session inkara House member ni tawh thi mi pathumte sûnna hun hman a ni.

House leader Lal Thanhawla chuan, MLA hlui thi pathum - Zakhu Hlychho, F Lalzuala leh Col. Lalchungnunga te chanchin a sawi a; opposition group leader Vanlalzawma leh MPC MLA Lalthanliana ten uina thu an sawi hnuah, speaker Hiphei kaihhruaina hnuaiah member thite sûnna atan hian House member-te ngawi rengin minute khat an ding.

Zakhu Hlychho hi December 15, 1943-ah Siaha district-a Mau­bawk khuaah a piang a; kum 1993-ah Saiha bial aṭangin MNF party ticket-in MLA atan thlan tlin niin, a hnuah Congress party a zawm a, minister of state-ah dah a ni. Hemi term chhung vek hian cabinet minister-ah dah a ni leh bawk. Kum 1998 khan Saiha bial aṭang vekin INC ticket-in MLA atan thlan leh a ni.

Zakhu Hlychho hi September 1, 2017 khan lu ná leh thisen sang vangin Maraland Gospel Centenary Hospital-ah dah luh a ni a, September 4-ah Aizawl panpui niin, September 6, 2017 khan Aizawl Civil Hospital-ah a thi.

F Lalzuala hi July 12, 1949-ah Ṭawipui, Lunglei district-ah a piang a; October 27, 1993-ah MNF party zawmin, hemi kum vêk hian Ṭawipui bial aṭangin MNF ticket-in MLA atana thlan tlin a ni a, a hnuah Congress party zawmin, deputy chief whip atana ruat a ni.

F Lalzuala hian June 12, 2017 kha heart attack a nei a, July 14 khan Congress Bhavan-a a kal chu nikhaw hre loin a tlu a, Aizawl Civil Hospital panpui a nih hnuah chawhma dar 10:30-ah a thi a ni.

Col. Lalchungnunga hi Sep­tember 15, 1938-ah Sertlangpui khuaah a piang a, sipai office niin, hun rei tak sipaia a ṭan hnuah a pension. Kum 1998 khan Aizawl West-I bial

aṭangin MPC ticket-in MLA atan thlan a ni a, cabinet minister niin, Social Welfare leh Labour & Employment department-te a enkawl.

Col. Lalchungnunga hian lung (heart) ṭha lo a nei tih kum 2009-ah hriat a ni a, lung ṭha lo a nei tih hmuh chhuah a nih hnuah pawh ṭha takin hun a hmang thei a; October 7, 2017 khan New Life Hospital-ah dah luh niin, November 10 zan lai pelh hnu, dar 12:15 a.m. khan a thi a ni.

Nimina Assembly session-ah hian report leh bill hrang hrang pharh a ni a; 'The Mizoram Parliamentary Secretaries (Appointment, Salaries, Allowances and Miscellanous Provisions) (Repeal) Ordinance, 2017' hnuhdawhna a tel.

Tun ṭum Mizoram Assembly session hi vawiin leh naktukah chhunzawm a ni dawn a, November 16-ah zawh a ni ang.