World Diabetes Day hman a ni

National Programme for Prevention and Control of Cancer, Diabetes, CardioVascular Diseases and Stroke (NPCDCS) leh Mizoram Diabetic Society (MDS) huaihawtin nimin khan Chanmari YMA Hall-ah World Diabetes Day hman a ni.

He hunah hian, kum 2016-17 chhung khan mi 1,08,009 enfiahnaah blood sugar nei mi 14,202 hmuh chhuah a nih thu an tarlang.

World Diabetes Day hmanna inkhawmah hian Aizawl Civil Hospital (ACH)-a medical superintendent Dr KL Remsanga chu khuallian a ni a, Hospital & Medical Education director Dr KK Chhetri chu chairman a ni. NPCDCS-a state programme officer Dr Lalruatdiki Chawngthu-in NPCDCS hmalaknate a sawi a, ACH-a medicine specialist Dr PC Lalramenga'n diabetes veite enkawl dan leh inven dante a sawi.

Dr Lalruatdiki Chawngthu-in report a peka a lan danin, sorkar kum liam ta, 2016-17 chhung khan Mizoram pumah NPCDCS-in camp ṭum 97 an nei a; mi 1,08,009 an enfiah zingah zunthlum (high blood sugar) nei mi 14,202 hmuh chhuah a ni a, thisen sang (high blood pressure) mi 13,411 hmuh chhuah a ni.

Mizorama NPCDCS-in hna a thawh ṭan kum, 2013-15 aṭanga 2016-17 (kum li chhung) khan camp ṭum 182 an nei a, mi 2,19,100 enfiah an ni. Mi 2,19,100 aṭang chuan high blood sugar nei mi 27,917 hmuh chhuah a ni a, thisen sang mi 29,082 hmuh chhuah a ni bawk.