Mizoramah Children's Day hman a ni

Nimin, November 14 khan naupangte ni, Children's Day a ni a, Aizawl leh district khawpui dang ṭhenkhatahte hman a ni. Naupangte'n lâm, zai leh an thiamthilte an entir a, intihhlimna hun hlimawm tak an hmang.

Children's Day hi Aizawlah chuan Social Welfare department hnuaia Mizoram State Child Protection Society (MSCPS) bultumin Ramhlun Indoor Stadium-ah hman a ni a; MSCPS programme officer Amy Lalrinpuii'n kaihruaiin, Social Welfare deputy director V Vanlalzawni khuallian a ni.

A Vanlalzawni chuan, Children's Day-in a tum ber chu, naupangte hnen­a mi bik an nihna leh hmangaih an nihzia hriattir a nih thu a sawi a; naupangte hnena hringnun hlimawm leh thianghlim pek chu nu leh pate leh puitlingte mawhphurhna a nih thu a sawi bawk.

Lungleiah chuan Convention Centre-ah Lunglei District Child Protection Unit (DCPU) buatsaihin hun hman a ni a, Lunglei DC Lalzarmawii'n a hmanpui. Lalzarmawii chuan, DCPU-in naupangte dikna chanvo humhalh kawnga nasa taka hna an thawk chu fakawm a tih thu sawiin, "Naupangte hi nakin lawka kan ram leh hnam hruaitu tur an nih avangin, uluk leh thiam taka enkawl an ṭul a, nu leh pate'n hemi kawnga kan mawhphurhna a sanzia kan hriat nawn fo a ṭul a ni," a ti.

Lungleia hun hmanah hian sorkar department ṭhenkhat hotu te, Child Welfare Committee, Special Juvenile Police Unit leh Juvenile Justice Board member-te an tel a; Lunglei khawpui leh a chhehvela home panga - KK Home, Bethel Centre, Shelter Home, Observation Home leh Baptist Church Orphanage-a supervisor leh naupang ṭhahnem tak an tel bawk. Lunglei DCPO Lalrin­kimi Hmar-in an hmalak dante a sawi a ni.

Lawngtlaiah pawh District Child Protection Unit huaihawtin Central YLA Hall-ah hman a ni a; Lawngtlai DCPO Mary Lalremruati'n kaihruaiin, LADC executive secretary H Lal­ramenga khuallian a ni. Naupangte'n an thial thilte an entir bakah, Lawngtlai DCPU-in naupang humhalh leh venhimna kawng­a hma an lak tawhnate thlalak hmangin an pho chhuak a ni.

Mamitah chuan Childline CPD leh District Legal Service Authority huaihawtin Chhimveng YMA Hall-ah hman a ni a, Childline coordinator C Lalrinhlui'n kai­hruaiin, Mamit chief judicial magistrate Gracy L Bawihtlung khuallian a ni. Mamitah hian Children's Day hmannaa tel zirlai naupangte chu ruih theih thil laka fihlim tura intiamna, signature campaign neihpui an ni bawk.