Congress-in MNF thil tih an dem

Congress party chuan thuchhuah siamin, Legislative Assembly thlasik ṭhutkhawma tel tura chief minister Lal Thanhawla kal tur MNF party mite'n an tibuai chu pawi an tih thu leh an dem thu an tarlang.

MPCC chuan, MNF huaihawta an party woker-te'n tharum hmanga Chief Minister session kal tur a bangla bula an lo zîm buai chu mawi lo an tih thu sawiin, "Hetianga chhan mumal pawh awm loa Assembly House ṭhutkhawm pawimawh tak ṭan ní-ah House leader ber tel thei lo tura tharum hmanga MNF-te'n lo tibuai a, session-ah pawh thu pawimawh ngaituah thei lo tura tharum hmanga an bei hi Mizoram mipui zah­ lohnaah kan ngai," an ti.

Congress party chuan, "Tunlai Aizawl khawpuiah lirthei tâwt lutuk vanga intlân chhâwk hial ngaia kan awm laia ṭul lo taka Aizawl khawpui lailíah lirthei hun rei tak che hlei thei loa an siam hi mipui pawisak lohna a ni," an ti a; MNF-te chu tharum hmanga mi páwngnêk chîng tawh lo turin an chah a ni.