NLUP kalpui zel tum a ni

Nimina Assembly session-ah Planning minister Lalsawta chuan, NLUP chu mamawh an awm zel avangin kalpui zel tum a nih thu House a hrilh.

MPC member Lal­thanliana zawhna kal zelah Lalsawta chuan, "NLUP hi kan sorkar chhunga tawp turin kan ti lo. A mamawh an awm zel avang leh a hlawhtling tawhte'n NLUP aṭanga ṭanpuina an dawn theih avangin tihtawp tumna a awm lo. Kum 2016-17 ah MLA bial tinah NLUP dawng tur 38 thlan thar an ni a, kumin hian 48 thlan thar tura kalpui tum a ni," a ti.

Planning Minister chuan, NEDP hnuaiah scheme hrang hrang a awm a, MLA bial anga sem loin, department hrang hrangah sum dah ṭhin a nih thu a sawiin, "Aizawl khawpui municipal huam chhunga MLA bial hrang hrang chhungah hian a ṭul dana sum dah a ni," a ti a; NEDP sum a hranpaa MLA bial chan tura dah a nih loh thu a sawi.