KHAWTHLIR

Chungnunga sûn
MPC party chuan nimin khan an party pisaa Durbar hall-ah inkhawm an nei a, MPC senior vice president tun hnaia thi, Col. Lalchungnunga sûnna hun an hmang.

Panel of Chairman
Nimina ṭan tak, Mizoram Assembly session neih chhunga speaker leh deputy speaker an remchan loh palh a, session kaihruaitu tur panel of chairman atan Nihar Kanti Chakma, T Sangkunga, Lalruatkima leh Lalrinawma te ruat an ni.

Trade fair
Indian International Trade Fair (IITF) 2017 chu Pragati Maidan, New Delhi-ah nimin khan president Ram Nath Kovind-in a hawng a, Mizoram aṭangin mi 11 an tel. Fair-ah hian November 18, 2017 hian Mizoram Day hman a ni dawn a, khuallian atan Union minister of state for MSME Giriraj Singh chu sawm a ni. IITF-a Mizo telte hian an thil siam chhuah hrang hrangte an pho chhuak a, mipui hlut a hlawh hle a ni.

Vawkte sem
AH & Vety dept. chuan nimin khan Lawngtlaiah NLUP hnuaia vawkvulh thlangtute hnenah vawk note an sem a, LADC EM C Lalneihkhuma'n a hman pui. Vawkte hi chhungkaw 536 hnenah pathum ṭheuha sem a ni.

Art Workshop
IPR department leh Mizoram Art Development Society ṭangkawp chuan nimin khan Archive Hall-ah Art Workshop, 2017 an buatsaih ṭan a, IPR director Lalnithangi'n a hawng. Art Workshop hian November 17, 2017 thleng a awh dawn a, artist 40 chuangin an thil ziah an pho chhuak a ni.