Mizote ram luah lai leh enkawl chin Hum ngam loah ZPM-in sorkar an puh

ZPM party hruaitute chuan, National Highway zauh tura hlawm ṭhennaah, Vairengte police checkgate thlang, Mizoram huam china chhungkaw 14 chu Assam lam package-2 lamah rîn luh a nih thu an sawi a; Mizoramin ram a luah leh enkawl chin pawh hum ngam loah Mizoram sorkar an puh.

ZPM hruaitute chuan nimin khan Aizawl Press Club-ah thuthar thehdarhtute an kâwm a; PAC member TBC Lalvenchhunga chuan, tun hnaia NHIDCL-in NH kawngpui an zauh tura zangnadawmna buaina kal zelah zangnadawmna phûttute an zir chian thu sawiin, "Nimin lawkah a hmunah kalin thil awm dan kan enfiah. Package ṭhen dan lo chhuakah Vairengte police checkgate thlang lam, Mizoram huam chhunga chhungkaw 14 zet chu Assam lam package-2 lamah rîn luh a ni," a ti.

Chhungkaw 14-te'n CALA hnenah Mizoram lam package-ah dah tura an ngen thu sawiin Lalvenchhunga chuan, "CALA hian NHIDCL hnenah thlen chhâwngin, package-2 hnuaia mi a nih vangin Ministry of Road Transport and Highways chauhin a enfiah theih a nih tur thuin an chháng," a ti a; NHIDCL-in forest clearance a dilna an chhannaah Mizoram sorkarin Vairengte chhak lam (package-3 chin) chiah an enkawl leh clearance dil ngai a nih thu an tarlang tih a sawi.

TBC Lalvenchhunga chuan, document hrang hrang thlirin Mizoram sorkarin Cabinet resolution-a Mizoram chin BEFR, 1875 a pawm chin chu sawi loh, tuna Mizote'n ram an luah lai leh enkawl chin pawh a hum ngam lo tih a sawi a, "Assam lama compensation dil a ngai leh forest clearance lak a ngai ta mai hi ZPM chuan hriatthiam har kan ti hle a ni," a ti.

ZPM hruaitute chuan, Mizo ṭhalaite'n thisen hial chhuaka an sah zauh sa tak ngial pawh hum ngam loah Mizoram sorkar puhin, "Kan sorkarin ramri chungchanga a thusawite rin tlak a nih lohzia a lang chiang hleah kan ngai," an ti a; Mizoram sorkar chu Mizote luah chin chhunga zangnadawmna leh phalna pe tura hma la turin an phût a ni.

Ramria police duty-te dinhmun a hmunah vawi eng emaw zat an enfiah thu sawiin ZPM hruaitute chuan, "Ramria police duty-te kawng engkima an tlâkbalzia leh an khawngaihthlakzia a takin kan hmu. Pathian leh mipui zarah ZPM kan sorkar chuan ramria police duty-te thuam chakin, Assam nena ramri chungchang hi political level-ah kalpui a ni ang," an ti.