Hna muan chhanah ruahtui tam leh kawng chhia puh fo a fuh lo - Governor
Governor Hari Babu Khambhampati chuan, fûr ruahtui tam leh kawng chhia chu in sak hna muan lutuk chhanah puh fo a fuh loh thu a sawi a; sorkar damdawi-inah doctor indaih loh reng ai chuan, Mizoram páwna doctor-te pawh lâk luh dan ngaihtuah ni se a ṭhat a rin thu a sawi bawk.
Heng thute hi Governor hian nimina JNV School sak mek leh Mamit District Hospital a tlawhnaah a sawi a; nimin vêk khan sorkar laipui scheme PMAY(U) leh PMUY aṭanga hamṭhatna dawngtute a tlawh bawk a ni.
Dr Hari Babu Khambhampati chuan Mamita JNV School tur sak mek a tlawhnaah thu sawiin, "Fûr ruahtui tam leh kawng chhia hi in sak hna muan lutuk chhanah puh a fuh lo. Mizoram sik leh sa hre chiangtute chuan an hnathawh hun chhung leh ṭan lak hun turte chiang takin an hre sa vek a ni," a ti.
JNV School sak chungchangah Governor chuan chak zawka hna thawh dan tur thuneitute a sawipui a; JNV satu contractor-te leh hna viltu engineer-te chu sak zawh thuai a nih theih nan chak taka hma la turin a hrilh.
Governor-in a tlawhnaa tarlan danin, Mamit JNV sakna atan a tirah cheng vbc. 18.05 ruahman a ni a, ennawn a nih hnuah cheng vbc 29.73-ah tihpun a ni. Tun thlengin cheng vbc 21.26 hman a ni tawh a, June 2022 velah sak zawh a, September 2023-ah luah theih beisei a ni.
Mamit District Hospital a tlawhnaah medical superintendent Dr Lalzuatliana'n an dinhmun tlangpui a lo hrilh a; naupang lam enkawltu doctor an neih loh avangin, an neih theih nan a ṭul anga hma lakpui turin Governor a ngen.
Governor chuan, doctor indaih lohna awm ṭhin chu pawi a tih thu sawiin, "Specialist doctor ṭhenkhat, sorkar hnaa an luh duh loh avanga doctor nei lo a an awm ai chuan, Mizoram páwna doctor-te pawh lâk luh dan ngaihtuah ni se, doctor indaih lohna a chhâwk zângkhai ka ring," a ti.
Dr Lalzuatliana sawi danin, kum 2021 chhungin Mamit district-ah nau nei mi 850 an awm a, chu'ng zinga 280 chuan damdawi-inah an hring a ni. Larsap Hari Babu Khambampati hian PMAY(U) leh PMUY hnuaia Mamit district-a hamṭhatna dawngtute a tlawh a; ṭanpuina an dawn chungchanga an ngaihdante a zawh bakah, ṭanpuina dawng àwm nia an hriat la dawng rih lote chu scheme chungchang hrilhfiah turin a chah a ni.