Rokunga Award dawngtu tur Malsawmkima

Rokunga Memorial Society (RMS) chuan nimin khan Aizawl Press Club-ah Mizo tlawmngaihna chhawm nung ṭhate tana chawimawina (award) an siam, Rokunga Award, 2021 dawng tur an puang a; award dawng tur chu Malsawmkima (64), Saitual Venglai a ni.

Rokunga Award hian tangkapui, thuchei leh Rs 50,000 a keng a; November 28, 2022 khian Aijal Club-ah hlan a ni ang.

Rokunga Award 2021 dawng tura thlan Malsawmkima, Saitual Venglai hi kum 20 mi a nih lai, kum 1978-ah Saitual khuaa tlawmngai berah thlan a ni tawh a, kum 2013-ah Saitual YMA-in ‘Tlawmngai Nopui’ an hlan tawh. A pualin 16th Group YMA-in office bearer post pakhat, joint secretary post an siamsak a, he post hi Malsawmkima lo chuan an chelh thei lo.

Malsawmkima hi khawtlang tana a ṭhahnemngaihna avangin kum 2006 khan misualin gelatine hmangin a in an bei tawh a, thah tuma beite leh chempuia sah tuma luhchilhte an awm tawh bawk.

RMS hruaitute chuan, Rokunga Award chu kum 2018-ah an sem ṭan thu sawiin, "Kum thum dana sem tur tih ni mah se, a kum thumna nikum khan Covid-19 avangin kan sem thei lo a, nikuma sem ai kuminah sem a ni dawn. Award hming pawh Rokunga Award, 2021 tih a ni a, kum 2021 aṭanga kum thumnaah award sem leh a ni ang," an ti.

Award dawngtu tur thlang turin Central YMA an thawhpui thu sawiin RMS hruaitute chuan, "YMA branch tin aṭangin mi pakhat zel nominate theih a ni a, an branch aṭanga nominate duh an nei lo a nih pawhin branch dang an nominate thei," an ti a, tun ṭuma award sem turah rawtna eng emaw zat a luh thu an sawi.

RMS hruaitute sawi danin, nomination lut thlifim turin Selection Committee din a ni a, chairman chu PC Lawmkunga, IAS (Rtd) niin, member secretary chu CH Thangkhuma a ni. Member dang mi pathum an awm bawk.