Damdawi hman lâr Pantop-D SR zinga Batch pathum a ṭha lo tih finfiah a ni

Mizorama damdawi hman lâr, Pantop-D SR zinga pathum chu damdawi ṭha lo (standard quality tling lo) a ni tih finfiah a ni.

Sorkar thuchhuah tarlan danin, Pantop-D SR damdawi ṭhenkhat chu tun hnaiah Health Services department hnuaia Food & Drugs Administration (FDA)-in endik turin Regional Drug Testing Laboratory, Guwahati-ah an thawn a; an thawn zingah Pantop-D SR batch pathumte chu damdawi ṭha lo a ni tih finfiah a ni.

Damdawi ṭha lo tih finfiahteah hian Pantop-D SR mûm (capsule) mal tina damdawi chi hnih awm tura label-in a tarlan Pantoprazole leh Domperidone-te a awm lo. Damdawi ṭha lote hi Guwahati aṭanga lak chhâwn a ni a, Assam Drugs Controller hnenah thil awmzia hriattir nghal niin, thil dik lo titute man chhuak turin an chhui zui nghal a ni.

Mizoram FDA chuan damdawi siamtu Aristo Pharmaceuticals Pvt.Ltd.-ah damdawi chungchang an zawtfiah tawh a, Aristo Pharmaceuticals chuan an siam a nih loh thu an sawi thung. An insawifiahna hi FDA chuan pawm tlakah a ngai a, chuvang chuan, damdawi ṭha lote chu 'A tak anpuia tute'n emaw a lem an siam (spurious)-ah ngaih a ni.

FDA chuan, Pantop-D SR zinga batch number pathum a ṭhat loh avangin Pantop-D SR zawng zawng a ṭha lo tihna a ni lo tih tarlangin, "Ei lai nei tan thlaphânna tur a awm lo," an ti a; damdawi zuarte chu an damdawi kawl lai zingah damdawi ṭha lo batch number a awm leh awm loh endik vek tur leh, an kawl a nih chuan hralh zui lo a, FDA hnena hriattir nghal turin an chah.

DAMDAWI ṬHA LOTE
1. Pantop-D SR
Batch no. SPM211927
2. Pantop-D SR
Batch no. SPA220030
3. Pantop-D SR
Batch no. SPJ211372