Lungawi lohna lantir tum ṭhulh rih

Aizawl North College (ANC) zirlai hruaitute chu an college campus tur chungchangah nimin khan sorkar hotute nen an inkâwm a; lungawi lohna lantir an tum chu an ṭhulh rih a, sorkar hmalakna an ngaichâng dawn.

Tarlan tawh angin, ANC Students Union (SU) hruaitute chuan, chief minister Zoramthanga'n ti tura a tih angin an college hmun tura an hual Falkland Vengah ram an teh zo tawh tih an sawi a, "Kan teh hnuah amah hmuh kan tumin appoinment min pe duh tawh lo," an ti.

ANC zirlaite chu lungawi loin November 10, Ningani khan an college awmna hmun, Ramhlun North-ah kawngpuiah an pungkhawm a, kawngpui an dang a ni.

ANC SU thuchhuah tarlan danin, nimina Higher & Technical Education, UDPA, GAD leh Land Revenue & Settlement department bakah, Aizawl DC leh SP-te nena an ṭhutkhawmnaah sorkar hotute chuan, college campus tura zirlaite dilna chu a rang thei ang bera a hmunhma teh a, a rang lama hma lakpui an tiam a ni.

Sorkar hotute thutiam chu rintlakah an ngai tih tarlangin SU chuan, "Min tiam anga hma an la vat lo a nih chuan nasa lehzualin lungawi lohna lantir leh kan tum," an ti.