END leh YMA CADS thawk dunin Ruihhlo vangin mi 121 man tawh

Central YMA-in September 9, 2022-a Central Anti Drug Squad (CADS) din a nih hnuah CADS duty-te leh Excise & Narcotics department (END) mite thawhhoin nimin thleng khan heroin kg. 4 leh gram 28, methamphetamine kg. 1 leh gram 971 (mûm 20,153) leh mi 121 an man tawh.

END leh CADS duty-te thawkho chuan November 10, Ningani zan dar 11:10 khan Bawngkawnah heroin gram 24 (hawng hnih) leh a neitua puh mi pathum - Lalmuanpuii (50) d/o Ralkapliana, Ngurvulmawii (38) d/o Lalkhupdova leh Malsawmdawngzela (31) s/o Thanghuama, Bawngkawn nia inchhál vekte an man.

Nimin zing lam dar 9:23 khan Ṭhuampui, Aizawlah heroin gram 137 (hawng 10) leh a neitua puh Suineu (44) d/o Thawmlian, Tahan, Myanmar, tuna Ṭhuampuia khawsa nia inchhál an man bawk.

Ruihhlo vanga mante lakah hian The Narcotic drugs & Psychotropic Substances Act, 1985 tlawhchhanin thubuai ziah luh a ni a, Special Court (NDPS Act)-ah thawn an ni.

END leh CADS hian September 9, 2022 aṭanga nimin thlengin ruihhlo kaihhnawihah mi 121 an man tawh a, chu'ngah chuan thubuai 55 ziah luh a ni.