Pastor pension-te politics-a inhman dan turah Synod-in a khuahkhirh na dawn lo

Mizoram Presbyterian Kohhrana committee sang ber, Synod Executive Committee (SEC) vawi 298-na chu November 8-11, 2022 chhung khan Synod Office-a JM Lloyd Hall-ah an ṭhukhawm a; agenda zingah, pastor pension tawhte politics-a an inhman chungchang telin, inhman theih loh tur ang zawngin an rél lo a, an khuahkhirh na dawn lo nia thu dawn a ni.

SEC ṭhutkhawmah hian Aizawl khawpui chhung aṭangin member 44 leh Aizawl khawpui páwn aṭangin member 89 an tel a, an vaiin mi 133 an ni. Synod moderator Rev.Dr Vanlalnghaka Ralte-in a kaihruai a, agenda 126 a awm.

SEC ṭhutkhawma agenda zingah pastor/minister pension tawhte politics-a an inhman dan tur kaihhruaina chungchang a tel a, kaihhruaina tur ruahmanna chu a tlangpuiin an pawm rualin, Synod Officers' Meeting-in a la chúlmám leh dawn nia thu dawn a ni.

Thu dawn danin, Synod hnuaia pastor/minister pension tawhte chu politics-a inhmang thei lo tura khuahkhirh a ni dawn lo a; chutih rualin, anmahni baptist-tu pastor tihmingchhe thei zawnga thil dik lo leh mawi lo ti lo tura beisei an nih bakah, MLA emaw an lo ni a nih chuan, anmahni leh an chhungte medical reimbursement chu Synod aṭanga la lo tura tih a ni ang. Heng bakah hian kaihhruaina dang eng emaw zat a awm bawk.

Tun ṭum SEC ṭhutkhawmah hian agenda zingah kum 2023 MLA inthlanpui atan pastor bial hrang hrangah revival speaker-te tirh chhuah rawtna te, Act East Policy zirchian chungchang te, kohhran inkhawm tihtlêm dan ngaihtuah chungchangte pawh a tel a ni.