Governor-in kohhran leh pawlte a kâwm

Governor Hari Babu Kambhampati chuan November 10, Ningani aṭang khan ni hnih chámin Mamit district a tlawh a; sorkar, kohhran, bank, political party leh pawl hrang hrang aiawhte a kawm bakah, sorkar scheme hrang hrang hnuaia hamṭhatna dawngtute a kâwm.

Hari Babu Kam-bhampati chuan, sorkar scheme-te chu a nihna ang taka hman a nih theih nan theihtawp chhuah turin sorkar leh bank hotute a fuih a, "Project ṭhenkhatte thawh chhung rei lutuk ṭhin leh thawh hun pawhsei a ni ṭhin hi thil fel lo tak a ni a, project-te hi a hun taka zawh theih dan official-te'n an ngaihtuah thiam tur a ni," a ti a; mipui hnena scheme ṭha tak takte hrilhfiah chu banker-te mawhphurhna a nih thu a sawi.

Zirnaah Mamit district chu ṭan an lak zual a ngai tih sawiin Larsap chuan, "Mizoram pum ang pawhin ṭan lak a ngai hle. Zirnaah district dangte aia hnufual bik a nih avangin Education lama hotute'n theihtawpa hma an lak a ngai a ni," a ti.

Mamit DC Lalnunhlua tarlan danin, Mamit district hi sq.km. 3,025.75-a zau a ni a, village council 89 awmin, mi 86,364 an chêng a, civil sub-division leh RD block pathum ve ve a awm. Mamit SP Lalthangpuii sawi danin, Mamit district-ah police (DEF) 235 awm tur an nih laiin, mi 129 chiah an awm mek a ni.