Central scheme-a hna thawh dan thlirlet

Rural Development minister Lalruatkima hoin nimin khan Aijal Club-ah RD department hotute'n an department hnuaia sorkar laipui scheme kalpui - MGNREGA, PMAY-G, SPMRM, BADP, PMKSY, SAGY, MzSRLM, SIRDPR leh a dangtea hmalak dan an thlirlêt.

Lalruatkima chuan, thingtlang tihhmasawnna turin RD department-in hmalakna a ngah tih sawiin, "Chhungkaw lian tak, thlawhma hrang hrang nei ang kan nih avangin kan hnathawhte sawihona hun kan neih hi a pawimawh," a ti.

Covid-19 hripui lên laiin thingtlang lama chêngte manganga an awm loh nan an theih chinah ni 100 inhlawhna ṭha takin an kalpui thei tih sawiin Lalruatkima chuan, "RD department hnuaia hmalakna hrang hrang aṭangin thingtlang loneitute chhawmdawl hna leh hmasawnna ruhrel hrang hrang kan kalpui thei hi thawktute inpekna a ni," a ti a; thlen chinah duhtâwk mai lo a, mipui tana thawk zel turin thawktute a chah.

RD Minister chuan, sorkarin agency a neih theih tawh loh avangin DRDA ni ṭhin chu DRDO tih a nih tawh thu sawiin, "Tun sorkarah Tlabung leh Kawrtethawveng RD block thar neih a ni dawn a, Kawrtethawveng RD Block-ah post creation phalsak a ni tawh a, Tlabung atan post creation buaipui mek a ni. Kumin December thlaah chuan heng hmunah hian BDO office hawn theih beisei a ni," a ti.