Zirlaite ngaihthahah sorkar an puh ANC in satu restricted tender-in thlang

ZPM Ṭhalai chuan thuchhuah siamin, chief minister Zoramthanga chu zirlaite ngaihthahah an puh a, vanduaithlak an tih thu an tarlang. Hetih lai hian, Aizawl North College (ANC) building sak zawm mek a ni a, satu contractor chu restricted tender hmanga thlan a ni.

ZPM ṭhalaite chuan, Aizawl North College zirlaite hnenah an college ram atan Falkland Venga UDPA department ram ruak chu Chief Minister-in pek a tiam tawh hnuah leh, ram pawh an teh hnuah CM Zoramthanga'n ANC zirlaite a hmuh duh loh thu an tarlang a, "Lung bang sut ang maia zirlaite laka CM a awm hi mak kan ti a, zirlaite ngaihthahtu CM kan nei hi vanduaithlâk kan ti hle," an ti.

RTI Act hmanga an zawhna chhanna tarlangin ZPM Ṭhalai chuan, Ramhlun North-a ANC building sak mek chu March 2023-a sak zawh tura ruahman a nih laiin, hna thawh tur chanve pawh thawh zawh a la ni lo tih an tarlang a, "Tunah hian 45% chiah thawh zawh a la ni a, a sakna atan Rs 68,77,440 pek chhuah a ni tawh," an ti a; hna thawh muan lutuk vanga zirlaite'n harsatna naménlo an tâwk mek tih CM-in a hai der tlat chu pawi an tih thu an sawi.

ZPM ṭhalaite chuan, ANC building sak hna a muan chhan sawifiah turin Mizoram sorkar an phût a, "College building sakna tur sum hi MNF sorkar hian a chheprelh em ni?" an ti.

RTI Act hmanga zawhna chhannaa a lan danin, ANC building sak zawm mek chu Sky Ridge Construction and Consultancy Services, Aizawlin an sa a, restricted tender hmanga thlan an ni. Sak zawmna sum chu RUSA hnuaia Component Infrastructure Grants to College aṭanga kal niin, tun thlengin Rs 1,50,00,000 (nuai 150) hmuh a ni tawh a; hna thawh tur zinga 45% vel thawh tawh niin, March 2023-a sak zawh tura tih a ni.