KHAWTHLIR

Heroin man
Serchhipa hmunpui nei Assam Rifles leh Champhaia Excise and Narcotics department mite chuan November 10, Ningani khan Champhai Zote-ah heroin gram 254.5 leh a neitua puh an man. Heroin man hi Rs 1,27,25,000 hû a ni.

Sipai lâk rûnpui
Rajiv Gandhi Stadium-a sipai lâk rûnpuia physical test leh medical test paltlang tawhte chu January 15, 2023-ah Common Entrance Exam neihpui an ni dawn. Exam hmachhawn tura koh, admit card neite chuan January 15, 2023 zing dar 4 aṭangin Rajiv Gandhi Stadium-ah biometric verification leh security check neih ṭan tur a ni a, chawhma dar 11 aṭangin exam ṭan tur a ni.

Hmalakna enfiah
Cod Nerc-in NABARD puihnaa khaw pathum - Sakawrdai, Zohmun leh Ṭinghmun khuaa theifeimúng chìn (litchi plantation) an kalpui mek chu NABARD assistant general manager Dilip Kumar Kadama leh Cod Nerc director B Lalchhanzova hoin tun hnai khan ni thum chhung enfiah a ni a, khaw pathumah hian theifeimúng chíng turin mi 200 thlan an ni a, theifeimung kûng 80 ṭheuh chín tir tura ruahman a ni.

Zirhona zo
Health & Family Welfare department, National Institute of Disaster Management, GeoHazards Society leh GeoHazards International-te buatsaih ni thum awh, 'Online training programme on building resilience of health facilities' chu nimin khan zawh a ni. Training-ah hian ni tin mi 230 chuang an tel ziah anga chhût a ni.

Kawng khar dawn
PWD-in vawiin zing aṭanga November 18, 2022 thleng, zing dar 9:30 aṭanga tlai dar 5 chhungin Armed Veng Presbyterian Kohhran biak-in bul aṭanga Magazine Kâwn inkar kawng an siam dawn a, hei vang hian kawngpui khâr a ni dawn. Hnathawh tibuai theiin lirthei leh bungrua dah phal a ni lo.