Dan loa ramri kâna Mizorama Pêm lut an awm lo - HM Zira

Home minister R Lalzirliana chuan MNF member Lalruatkima zawhna chhangin, kum 2012-2017 chhungin Mizoramah dan loa ramri kâna rawn pêm lut an awm lo niin House a hrilh.

Home Minister tarlan danin, Mizoramin international border kms. 722-a thui a nei a, chu'ng zinga km. 404 chu Myanmar nena inrina niin, a bak km. 318 chu Bangladesh nena inrina a ni. Ramri hi BSF leh Assam Rifles-te'n an vên avangin a hranpaa international border veng turin Mizoram Police Outpost/Border Outpost din a ni lo.

Khawchhak lam, Myanmar nena inrina chu 10th. Bn. Assam Rifles-in an vêng a, khawthlang lam chu 1st. Bn 159th Bn. Border Security Force-in an veng thung. Ram dang mite Mizorama an rawn pêm lut tur dan kawnga assessment report sorkarin a dawn chinah chuan an thawk ṭha tura ngaih a ni.

Lalruatkima chuan, October 20, 2015-a Assembly session-a a zawhnaah kum 2010-2015 chhungin Mizoramah foreigner dan loa ramri kâna rawn lut zat chu mi 598 a nih thua chhan a nih thu tarlangin, "Hei hian department an sincere lohzia a tilang chiang hle," a ti a; Home Minister chu sawifiah turin a phût.

Home Minister chuan, Home department-te chu an sincere thu sawiin, "Kum 2015-a zawhna kha foreigner dan loa ramri kâna rawn lut zat a ni a, tun ṭuma zawhna chu ramri kana rawn pêm lut zat a ni. Dan loa rawn lut leh pêm lut zat hi chu a sawi tum danglam daih a ni. Chuvangin, kan chhanna hi dik lo a awm lo," a ti.

Myanmar rama buaina vanga raltlan mek Rohingya-te Mizoramah lut an la awm loh thu sawiin R Lalzirliana chuan, "Chutiang a nih lai chuan Myanmar lama ramriah Arakan leh Myanmar sipaite an inkâp vak a, raltlan vel chhim lamah an awm mek a, a theih ang anga lo thlen an ni," a ti a; Mizorama rawn raltlante chu Zo hnahthlakte an nih thu a sawi.