MNF-in MLA aṭanga bàng turin CM Lal Thanhawla an phût

MNF party chuan chief minister Lal Than­hawla chu kum 2013 Assembly inthlan dawna affidavit a thehluhah, Kolkata-a a ram neih a zêp niin an sawi nawn a, "Chhechham meuha MIzo mipui leh Election Commission of India (ECI) bumtu Pu Lal Than­hawla hi MLA aṭanga a bàn kan phût," an ti.

MNF party hruaitute chuan nimin khan Aizawl Press Club-ah thuthar thehdarhtute kâwmin, CM Lal Thanhawla'n inthlan dawna affidavit a thehluhah a thil neih zêpa ECI a bum nia an hriat dan an sawi a; MNF general secretary MC Lalrinthanga chuan, Lal Thanhawla chuan Mizoram mipui leh ECI a bum a, dâwt a hrilh niin a sawi.

MC Lalrinthanga chuan, kum 2013 MLA inthlan dawn, November 8, 2013-a affidavit a thehluhah Kolkata-a a in hmun, cheng nuai 200 chuang hû a ziak tel lo a, chu chu tun hnaiah hmuh chhuah a ni tih sawiin, chu in hmunah chuan in lian tak leh chhawng sang tak a sa mek tih a sawi a, "A thil neih zêp rûa dawt a sawi vanga MLA-a tlingah leh sorkarna siamah kan ngai a, a dâwt sawi hriat chhuah a nih takah chuan, MLA aṭangin a báng ngei turah kan ngai a, kan phût bawk a ni," a ti.

CM Lal Thanhawla leh a nupuiin CM hlawh leh an in luah man bâk sum lak luhna lian tham an nei lo nia sawiin MC Lalrinthanga chuan, "In hmun to em emna Kolkata-ah in hmun plot no. AI-178, sq.ft. 3,228-a zau, market rate-a chhûta cheng nuai 200 chuang fêa hlu a lei mai thei hi mak kan ti a. Aradhana, RK Puram, New Delhi-ah flat lian tak mai a nei tih thâwm kan hre bawk," a ti a; Falkland Vengah park ropui leh lian tak an neih thu sawiin, chu'ng zawng zawng chu MLA/CM hlawh aṭanga lei theih nia an hriat loh thu a sawi.

MNF party chuan Lal Thanhawla chu dan bawhchhe ngeiah ngaiin, dan bawhchhiaa affidavit-ah zêpruk a neih avangin dan anga hrem theih a nih thu an sawi a; Lal Thanhawla chu mipui leh ECI a bum avangin ECI-in emaw, Zoram mipuiin emaw loh theih loha an chawlhtir nghak loa MLA aṭanga báng tura an phût thu leh ngaihdam dil tura an phut thu an sawi bawk.