District zir chiangtute'n report an thehlut tawh

GAD changtu, chief minister Lal Thanhawla chuan MNF member Lalruatkima zawhna chhangin, district pek leh pek loh zir chiangtu tur District Re-Organisation Committee chuan an tih tur an tizo a, July 17, 2017 khan report sorkarah an thehluh tawh thu a tarlang.

Chief Minister tarlan danin, District Re-Organisation Co­mmittee hi June 16, 2016-ah din a ni a, district leh sub-division-te ramria enfiah a, tihdanglam ngai a awm chuan rawtna siam tur te, district thar siam rawtnate enfiah a, ṭul leh ṭha a tih anga district thar siam leh rawtna siam turte leh, district leh department ṭhenkhat division ramri/huam chin siamṭhat a ni dawnin administrative/revenue district nen inhmet rem tura ruahmanna siamte a ni.

District Re-Organisation Committee hian district atana puan tawh Khawzawl, Hnahthial leh Saitual-te chungchang a ngaihtuah tawh a, rawtna an siam. An rawtnate chu sorkarah an thehlut tawh a, sorkarin a ngaihtuah mek a ni.

District thar din tur hian ngenna ṭhahnem tak sorkar chuan a dawng a, chu'ng zingah chuan Kamalanagar district siam tura dilna pawh a tel.

District Re-Organisation Committee chuan mipuite leh ram hmasawnna tur atana a ṭang­kai dan tur leh sum sen ngai hrang hrangte a ngaihtuah hnuah rawtna an siam a ni.