Kum 2013 MLA inthlan laiin Kolkata-a CM Hawla ram tihfel a la ni lo - MPCC
Congress party-a Media department hotute chuan, an party president Lal Thanhawla, chief minister-in Kolkata-a ram a neih thu, 2013 Assembly inthlan dawna affidavit-a a ziah lan tel loh chhan chu, inthlan laiin neitu nihna a la neih fel loh vang niin an sawi.
MPCC Media department-te hian nimin khan Aizawl Press Club-ah thuthar thehdarhtute an kâwm a; MPCC Media chairman James Thanghmingmawia chuan, Lal Thanhawla hian Kolkata-a a ram chu July 2014-ah neitu nihna dik tak a nei chauh avangin, kum 2013 inthlanah ziah lan tel a rem lo niin a sawi.
James Thanghmingmawia sawi danin, April 13, 2011-ah West Bengal sorkarin West Bengal Housing Infrastructure Development Corporation (HIDCO) Chairman quota-in India rama mi langsâr leh hmingṭha (filmstar, infiammi, IPS, High Court judge leh politician) bikte hnenah Kolkata New Town-ah in hmun a sem a; Lal Thanhawla pawh a tel. Lal Thanhawla leh HIDCO chuan August 30, 2013-ah 'Deed of Conveyance' an ziak a, tax leh chawi ngai Rs. 17,61,760 a pek hnuah ram ruak pakhat chu a hmingin a awm ta a ni.
Ram chu a hmingin awm tawh mah se, Lal Thanhawla chuan neitu nihna tak tak a la nei thei lo nia sawiin Thanghmingmawia chuan, "Neitu nihna tak tak nei tur chuan New Town Kolkata Development Authority-ah inziah fel a ngai a, chu chu Mutation tih a ni. Neitu nihna tak tak chu kum 2013-a Assembly inthlan zawh fel hnu, July 25, 2014-ah tihfel chauh a ni," a ti a; tihfel a nih theih nan hearing nei turin April 22, 2014-ah CM Hawla chu koh a nih thu a sawi.
Thanghmingmawia chuan, Kolkata-a ram neih chungchangah CM Lal Thanhawla chu sorkar laipui hnuaia thawk pakhatin affidavit dik lo (false affidavit) hmanga inthlan chuh anga puhin Election Commission of India (ECI)-ah a hêk tih sawiin, pawi an tih thu a sawi a, "ECI-a hektu hian Pu Hawla’n ram a neih danah, New Town Development Authority hnuaia hming thlak/tihdanglam a tihfel hun leh nite a la chhuak tel vek a, mahse, hei hi sawi tel duh loin, mipui fuihpawrh zawngin a che a ni," a ti.
James Thanghmingmawia chuan, "Kum 2013 Assembly inthlan dawna affidavit siamah khan Pu Lal Thanhawla hian New Town-ah hian in hmun a nei angin lo insawi ta se, dâwt a sawi a ni zawk dawn a; a chhan chu a neitu nihna tak tak a la tihfel loh vang a ni," a ti a; ramah chuan kut thlak thuai a nih loh chuan chhuhsak emaw, luahlan emaw theih a nih avangin, a theih ang anga in sak a ngaih thu a sawi.
MNF-te chu Kolkata-a Lal Thanhawla ram neih dan zir chiang hmasa loa che-ah puhin MPCC Media Chairman chuan, "Thu dik hi pawm ngam se, hma an lak hmain thil nihna dik tak zir chiang hmasa se. Mi dang harsatna siam zawng leh mipui rokhawlhna siam zawngin che lo se kan duh hle a ni," a ti.