Cheng vbc. 4.45 VAT àwltir tawh

Mizoram sorkar chuan kum 2013 aṭanga nimin thleng khan Mizorama thawk company/mimal chhiah Value Added Tax (VAT) âwltir paruk a nei tawh a, chu'ng company/mimalte VAT âwl belhkhawm chu cheng vbc. 4.45 a ni.

MNF member Dr K Beichhua leh Lalruatkima zawhna inṭâwm chhangin Taxation minister Lal­sawta chuan, kum 2013 aṭanga nimin thlengin VAT awltir mi paruk an awm tawh thu a sawi a, "Kum 2012 aṭanga 2017 chhung­in VAT âwl dil firm 15 an awm. An dil ang hian tihhlawhtlinsak an ni vek lo," a ti.

Taxation Minister tarlan dan­in, Mizoram Value Added Tax Act, 2005 Section 47 tlawhchhanin tax exemption pek a ni. Phalsak an nih chhan chu, sorkarah VAT petu tur, company (eg. NECS) emaw, department emawte'n VAT âwl an dil a, sorkarin a ngaihtuah chian hnuah VAT awltir phalsak chi nia hriat vangin phalsak a ni.

Lalsawta chuan, chhiah pek tur chu a tlangpuiin a lei tur emaw, service hmangte an nih ṭhin thu sawiin, "Chuvangin, department-te'n thil an lei dawn a, a leina man hi sorkar thoin a pek tur a ni. Taxation department-ah an chhun luh kher ngai loin VAT an âwl dilna hi phalsak an ni," a ti.

NECS-te VAT âwl an nih chhan sawiin Lalsawta chuan, "An dil chhanah football lama hmasawnna atana AFC ṭanpui an duh thu leh, VAT awl an dil zat cheng nuai 126 chuang hret chu a bo bâng awm loin AFC-ah pek luh an tiam a ni. Mizote kan hmingṭhatna lan chhuah ve theihna a nih avangin kan phalsak a ni. AFC-ah lut lo se sorkarah a lut dawn a, AFC ṭanpuitu tak chu sorkar a ni tho," a ti a; company dangte chu NECS anga tu nge an puih tur an tarlan loh avangin VAT âwl phalsak an nih loh thu a sawi.

Taxation Minister chuan, Champhai Grape Growers Society leh Hnahlan Grape Growers Society-te VAT âwltir an nih chhan sawiin, "Grape chíngtute an tum anga an hlawhtlin tâk loh avangin chhiah âwl an lo dil a, phalsak an ni," a ti.