Lawngtlaiah mega mock drill buatsaih

Lawngtlai District Disaster Management Authority (DDMA) chuan nimin khan Lawngtlai khawpuiah chhiatrupna a thlen thulha chêt lak dan tur a taka enchhinna, Mega Mock Drill an buatsaih.

Mock drill-ah hian National Disaster Response Force (NDRF) 1st Battalion, Guwahati aṭang­in assistant commander Santosh Kumar Singh hoin team member 35 an tel a; State Disaster Mangement Authority aṭangin mock drill kalpui dan en thlithlai turin observer pahnih an kal bawk.

Zing dar 10-ah Lawng­tlai DC office-ah chhiatna thlen hriattirna (disaster siren) tihrik a ni a, mega mock drill ṭan a ni. Lirnghingin Lawng­tlai khawpuiah chhiatna a thlen anga tih chhin niin, chhiatna tênau hmun hrang hranga thleng kar­ah Lawngtlai DC office leh Lawngtlai District Hospital te chu chhiat­na thlenna pui ber anga a ni a, in chim leh kângmei chhuak kara chhan­chhuah hna thawh dan leh thil tih dan tur a taka chan a ni.

Mega mock drill-ah hian district administration, Health department, Police department, Fire & Emergency Services leh sorkar department hrang hrang bakah, World Vision India leh an hnuaia volunteer te, Adventure Club leh YLA member-te an tel a ni.