Chite lui humhalh tura hmachhawpte sawiho

Chite lui humhalh kawnga hmalak dan ngaihtuahin nimin khan chief secretary Lalmalsawma hoin Secretariat conference hall-ah ACM councillor te, a kaihhnawih department aiawhte leh Save Chite Lui Executive Committee member-te an ṭhukhawm a; hmalak tawhte leh Chite lui humhalh tura hmachhawpte an sawiho.

Meeting-ah hian Aizawl Municipal Corporation (AMC) hnuaia Special Committee on Anti-Littering leh Central YMA-te hmalaknain Aizawl khawpui veng hrang hrangah Save Chite Lui Task Force din dan ngaihtuah ni se, tih a ni a; task force hna thawhna atana sum sen tur chu AMC leh UDPA department-ah thehluh ni se, estimate chu SIPMIU-a mithiamte'n buatsaih se, an ti.

Committte chuan, Aizawl Bawrhsapin a din, District Level Committee on Save Chite Lui chu ṭangkai zawka hman dan kawng dap an rêl a, Chite luia checkdam siam hna leh hoarding târ bakah, dan loa bawlhhlawh leh leivûng paihna hmun (vulnerable spot) hung hna chu Aizawl DC Office kutah an dah.

Chite lui kama dan loa paih leivûng tlingkhawm chu hmang ṭang­kaiin, lui dungah lirthei leh mihring kalna tur siamna atan hman dan kawng dap tum a ni a; hemi chungchang sawiho tur hian AMC hotute leh sorkar department hotute chu inràwn khawm ni se, an ti bawk.