KHAWTHLIR
La peihfel lo
School Education minister H Rohluna chuan INC member Dr Ngurdingliana zawhna chhangin, sorkar high school-a science leh mathematics zirtirtu lak turah ruahmanna peih a la nih loh thu House a hrilh a, "Mi 111 lak tum a ni a, September 26-28 khan written exam buatsaih a ni a, December 8-ah result puan a ni ang a, MPSC-in interview an conduct dawn a ni," a ti.
BLO training
Nimin khan Serchhip DC conference hall-ah an district chhunga booth level officer-te tan special summary revision chungchangah training buatsaih a ni. Serchhip DC Sangchhin Chinzah chuan, "Inthlang ram kan ni a, kan ram hruaitu turte kan thlannaah thianghlim leh felfai taka kan inthlan theih nan vote nei thei zawng zawngte electoral roll-ah an hming a chuan a ṭul a ni," a ti.
Tlan phal lo
Traffic SP chuan thupek chhuahin, SIPMIU-in Lower Zarkawt kaltlang Chanmari leh Israel Point inkar kawngpui siamṭhat hna November 14-18, 2017 chhungin zan tin dar 9 aṭanga a tûk zing dar 5 thleng an thawh ṭhin avangin, he kawngpuiah hian lirthei eng chi mah tlan tlang phal a ni loh thu a tarlang.
MZU VC lawm
MZP leh MSU chuan a hran ve vea thuchhuah siamin, Mizoram University (MZU)-in hun rei tak chhung Vice Chancellor nghet a neih loh hnuah Vice Chancellor thar, Prof. KRS Sambasiva Rao dah a nih ta chu lawmawm an tih thu an tarlang. Prof. KRS Sambasiva Rao chu thinlung taka an lo lawm thu leh, MZU hnuaia zirlai zawng zawng tan theihtawp chhuaha rahbi thar a kaipui leh MZU-in hma a sawn phah ngei an beisei thu an sawi.
Bill pass
Nimina Assembly session-ah Higher & Technical Education minister R Romawia put luh, 'The Mizoram State Higher Education Council Bill, 2017' chu House-ah sawiho a nih hnuah lungrual taka pass a ni.