Union Minister-in hmarchhak tan road project Cheng vbc. 1,00,000 chuang senna tur a puang ; Mizoram chhunga hman tur cheng vbc. 6,664

Union minister for Roads, Transport & Highways Nitin Gadkari chuan November 11, 2022 khan hmarchhak state pariata kawng siamna tura sum ruahman a puang a, kawng siamna atan hian cheng vbc. 1,00,000 chuang hman tura ruahman a ni. Mizoram chhunga kawng siamna tur atana ruahman chu cheng vbc. 6,664 a ni.

Nitin Gadkari-in a puan dan chuan Arunachal Pradesh-in an chang hnem ber dawn a, cheng vbc. 44,000 an chang dawn. A chang tlem ber Sikkim chuan cheng vbc. 2,000 an chang dawn a, Mizoram chu chan tam lamah parukna niin, Arunachal Pradesh, Assam, Manipur, Tripura leh Meghalaya aiin a chang tlem zawk.

Mizoram chhunga kawng siamna tur atana ruahman cheng vbc. 6,664 hi project pali atan a ni. Project pakhat Aizawl by-pass road 2-lane ah chuan hmun thumah leiverh tura ruahman a ni a, hmun thuma leiverh tur belhkhawm thui zawng chu km. 2.5 a ni.

Hetihlai hian, November 11, 2022 vêk khan Nitin Gadkari ho hian Guwahati-ah national highway chungchangah meeting neih a ni a, chief minister Zoramthanga pawh a tel.

Sorkar thuchhuah tarlan danin, Union Minister chuan Mizorama kawng siam hna thawh mek chu ṭha tiin, "Theihtawp chhuahzel nise," a ti a, thla hnih khat hnuah Mizoramah rawn kal a tum thu Chief Minister hi a hrilh a ni.

Mizoramin lei (bridge) pahnih dawhna tur a dil mek chungchangah Nitin Gadkari chuan phalna pek a nih thuai tur thu Zoramthanga hi a hrilh niin sorkar thuchhuah chuan a tarlang bawk.