General PYD Conference a ṭiak

United Pentecostal Church of North East India ṭhalai inkhawmpui lian, General PYD Conference vawi 44-na, November 10, 2022 zana Khawzawl Zuchhip Field-a ṭan chu nizan khan a ṭiak.

Inkhawmpuiah hian thupui atan 'I pianna ramah haw leh rawh' tih hman a ni a; rawngbawltu hrang hrangin thupui hmang hian thu an sawi a ni. November 11, Zirtawpni khan rorel palai 300 velin ro an rel a, kum 2024-a General PYD Conference thleng turin Lunglei thlan a ni.

Conference report-a a lan danin, UPC-NEI hnuai­ah hian district 13 - North Mizoram, Aizawl East, Lunglei, Chhimtuipui, Lawngtlai West, Central, Imphal, Churachandpur, South East Nagaland, Chandel, Barak, Tripura leh Fields/ Delhi te a awm a; heng district 13-ah hian PYD member 26,676 an awm a ni.