Mamit in commerce leh science college A neih theihna atan hmalak a ni ang - Union Minister of State

Union minister of state for Finance Dr Bhagwat Karad chuan November 11, Zirtawpni khan Mamit a tlawh a; a tuk Inrinni khan Mamit DC conference hall-ah sorkar hotute Review Meeting a neihpui. Union MoS chuan, Mamit district-in commerce leh science college a neih theih nan hmalak a nih tur thu a sawi.

Union MoS Dr Bhagwat Karad pual hian Mamit Chhimveng YMA Hall-ah Credit Outreach Programme neih a ni a, Mamit district-a bank hrang hrang - SBI, MRB, MCAB leh NABARD kaltlangin beneficiaries 560 hnenah loan cheng vbc. 8.02 pek chhuah a ni.

Dr Bhagwat Karad chuan, aspirational district Mamit chu an dinhmun hriaa zirchiang tur leh banking facilities mi zawng zawng tana ban phak a nih dan hrilhhre tura tlawh a nih thu a sawi.

Mamit District Hospital, primary school, anganwadi centre leh ration lakna (PDS) centre-te Union MoS hian a tlawha, harsatna an neih hrang hrang an lo thlente chu a theih anga chinfelsak an nih tur thu a hrilh.

November 12, Inrinnia sorkar hotute nen an inkawmnaah Dr Bhagwat Karad chuan, "District chhung sub centre 39-ah nau neihna labour room pakhat ṭheuh sak a ni ang. Labour room-a staff tur erawh state sorkar ngaihtuah tur a ni a, Mamit district-in commerce leh science college a neih theih nan hmalak a ni ang," a ti.

Union MoS hian Mamit khawpuiin tui lamah harsatna an tawk ṭhin tih a hriat thu te, Mamit khawpui aṭanga khaw hrang hrang kal theihna public transport awm lo chu ngaihpawimawh a nih tur thute pawh a sawi.

Mamit bialtu MLA H Lalzir­liana pawhin Union MoS hnenah hian Mamit district mamawh hrang hrangte lo thlenin, harsatna an tawh mekte pawh a theih anga sutkianpui turin a ngen nghal a ni.