Kan ramin ṭhatna lai kan neihte hi Sawi tam a hun tawh - IPR Minister

Foundation for Drug-Free Mizoram High Council chu November 12, 2022 (Inrinni) khan Synod Conference Centre-ah an ṭhukhawm a, khuallian IPR minister Lalruatkima chuan, "Kan ramin ṭhatna lai kan neihte pawh sawi tam a hun tawh," a ti.

Lalruatkima chuan Mizoram a chhe zawngin sawi a ni fo tih sawiin, "Ruihhlo tamna a ni kan ti ṭhin a, a dikna chen pawh awm tho. Mah se, mi ṭha leh fel tak tak kohhran leh khawtlang tana theihtawp chhuah, an thiamna leh finna hmang tam tak an awm. Kan ramin ṭhatna lai kan neihte pawh hi sawi tam a hun tawh. Mi ṭha leh felte kan idol-te an nih theihna turin kan inzirtir pawh a ṭul hle a ni," a ti.

Mizo mipuite'n social media an hman nasat thu sawiin IPR Minister chuan, "A bik takin ṭhalaite'n a ṭha lam aiin a chhe zawng atan an hmang uar niin a lang. Hei hian kan moral value tam takin a tichhe mek niin ka hria," a ti a, social media hmanna kawngah pawh zirtirna ṭha neih zel ṭul a tih thu a sawi.

Lalruatkima chuan Mizoram chu international drug traffic route-a awm kan nih avangin ruihhloin kan ram a tibuai nasa hle tih sawiin, "Nasa takin min chimral mek zel a, chutiang kara ruihhlo dotu tur pawlte an lo chhuak zel hi a lawmawm. Mizoram sorkarin theihtawp chhuahin ruihhlo a do ṭhin a, chutih rualin sawrkar leh mipui inkarah thawh hona ṭha a pawimawh," a ti.

Lalruatkima chuan, Mizoramah de-addiction home neih avang hian mipuite kan inthlahdah deuh ṭhin nia a lan thu sawiin, "Chhungkua aṭanga bul kan ṭan ṭhat a zirtirna dik kan pek a, sikul leh sunday school lamah zirtirna pek chhunzawm an nih chuan ruihhlo lakah hian kan tu leh fate kan venghim thei dawn a ni a," ti a, ruihhlo ngaite chu kan hnampuite, kan thisen zawmpuite an nih avangin hmangaih tak leh duat taka theihtawp chhuaha kan enkawl an mamawh thu a sawi.