HIV/AIDS hluar zel tur dona tur Zoram Harh Rawh Campaign hawng

Health & Family Welfare minister Dr R Lalthangliana chuan Central Young Mizo Association (CYMA) leh Mizoram State AIDS Control Society (MSACS)-te'n HIV/AIDS hluar zel tur dona kawnga hmalakna, 'Zoram Harh Rawh Campaign' an buatsaih chu , November 11, Zirtawpni zan khan Tuikhuahtlanga CYMA Hall-ah a hawng. Campaign-ah hian Branch YMA-te'n Mizo hnam lam leh zai hmangin intihsiakna an nei dawn a ni.

Dr R Lalthangliana chuan, CYMA-te'n pa chan changa Mizoram harsatna lian ber HIV/AIDS do hneh a nih theihna tura MSACS-te nen thawhhona thuthlung an ziak chu lawmawm a tih thu a sawi a, "Mizoram chu ram ralmuang, ziak leh chhiar thiam tamna, sakhaw khat vuan tamna, rampawn mite tan pawha tlawh chakawm a nih laiin, heng kan chhuanawmna phenah hian HIV/AIDS leh cancer vei tamna kan ni erawh a pawi tak zet a ni," a ti.

Heng natna hluar mek do hneh hi mut mawh hnar mawha neih ṭheuh a ṭul tawh thu sawiin Dr Lalthangliana chuan, "HIV/AIDS hi damchhung titawi thei natna, retheihna leh ram hmasawnna tiṭhuanawptu, ṭhalaite hnathawk thei loa siamtu leh hnam timang thei natna a ni a, hmangaihna leh lainatna nena kan do let a ngai a ni," a ti a; HIV/AIDS do tura thawhhonain rah duhawm tak a chhuah ngei a beisei thu a sawi.

CYMA president R Lalngheta leh general secretary Prof. Lalnuntluangate pawhin, ram leh hnam a ral loh nan HIV/AIDS do tura kan ṭan tlan ṭheuh a pawimawh thu an sawi a; MSACS project director Dr Lalthlengliani chuan, "Intihsiakna ngawr ngawr aiin, ṭhalaite ko khawma HIV/AIDS do tura tih tur leh tih loh tur inzirtirna hun hman chu kan duh ber a ni," a ti.

Zoram Harh Rawh Campaign-ah hian HIV/AIDS darh zel tur ven nan mipui inzirtirna ni pahfawmin district pakuaah YMA Branch-te'n hnam lam leh zaia intihsiakna an nei dawn.

Mizo hnam lam intihsiakna atan cheraw (kantluang) leh khuallamte thlan a ni. Hla hmanga intihsiakna atan Darmani zai chu hla inṭawm tur a ni a; Lianrikhumi zai, Awithangpa Tlawh zai, Labour V Force zai leh Domangi zaite zinga an duh ber pakhat thlanga intihsiak tur a ni bawk.

District tina tiṭhazualte hian December 1, 2022 (World AIDS Day)-ah Aizawlah rampum huap inelna an hmachhawn leh dawn a ni.