Sorkar ṭha siam duhin Congress-ah Mi an rawn lut zel - Congress MLA

Hachhek bialtu MLA Lalrindika Ralte chuan sorkar ṭha siam duh leh chief minister mi rinawm leh dik duhin Congress party zawmtu an pung zel niin a sawi.

November 12, Inrinni khan a bial chhung Tum­pangluia vantlang inkhawm buatsaihah thu sawiin Lalrindika Ralte chuan, "Tunhnaiah sorkar ṭha siam duh leh chief minister mi rinawm leh mi dik duhin Aizawl leh Mizoram hmun hrang hrangah Congress zawmtu an pung zel a ni," a ti.

Lalrindika Ralte chuan Aizawl Munici­pal Corporation huam chhunga local council member-te pawhin tunhnaiah Congress an zawm thar nia sawiin, "Vawiinah MNF aṭangin VC kan neih belh leh a, a lawmawm takmeuh a ni," a ti a, mithar an nei zel chuan bialtu MLA leh Congress party-ah bei­seina mipuiin an neihzia a lantir niin a sawi.

Mizoramin ni tinin sorkar ṭha siam turin hma lam a pan zel tih sawiin Hachhek Bialtu MLA chuan, "Sorkar ṭha hi mi retheite hian kan mamawh zual hle a ni. Tin, sorkar sum hi mipui kan awm avanga awm, mipui sum a ni. Chuvangin, sorkar sum duh duha hman hi mipuite hian kan haw hle tur a ni," a ti.

Congress party thuchhuah tarlan danin Lalrindika Ralte hian Tumpangluiah hian MNF VC member pakhat bakah mi 42 dang an party-ah a lawmlut a ni.

Inrinni vêk khan Lalrin­dika Ralte hian Tum­panglui leh New Eden khawtlang mamawh chi hrang hrang bakah, Kawrtethawveng khaw tan khawchhung bawlhhlawh paihna tur motor, tractor tipping trailer leh VC House-a hman tur water cooler a hlan a ni.