Kan ramah eirukna a hluar - ZPM President

ZPM Chalfilh West Block chuan November 12, Inrinni khan Sesawng Venglai community hall-ah political training an buatsaih a, an hun hmanpuitu ZPM presi­dent Lalliansawta chuan Mizoramah eirukna a hluar niin a sawi.

Lalliansawta chuan, Mizoramah eirukna a hluarin, sualna a punlun em em tih sawiin, "Mi ṭhahnemngai tak takten chanchinbuahte thu ṭha tak tak an chhuah fo a, mahse kawng ro erawh a su mawh hle a ni. Hetiang ringawta kan ram hi a awm reng chuan ṭhangtharte tan beisei tur a awm dawn lo a ni," a ti.

ZPM President chuan an party an phurin, Pathian zarah sorkar an inbeisei thu sawiin, "Kan hotute pawh hah sawi thei loin hmun hrang hrangah an zin kual reng a, hah pawh an hah hle a ni," a ti a, report hrang hrangte an ngaihthlak aṭangin mipuiin kalphung thar an mamawh hle tawh tih a hriat thu a sawi.

Ei leh barah kan intodelh loin, ram pawn aṭangin kan ei leh in tur ṭhahnem tak kan la lalut reng tih sawiin ZPM President chuan, "Kan kawngte hi a chhe em em reng mai a, power ni se kan intodelh lo em em a ni. Kan sorkar neih tawhte hian eng nge ram tan an tih hi zawhna lian tak a ni." a ti.

ZPM President chuan Mizoramin a hmuh leh hriat ṭhin chu CM thu lutuk a nih thu sawiin, "CM kan intlawnsiak luai luai ringawt a, an thu lutuk hi awm ngaihna an hre lo. Anmahni ngei pawh hian an zo ṭhin lo a ni," a ti a, ZPM chuan CM leh president nih kawp leh CM works department chantir an remtih loh thu a sawi.

Lalliansawta chuan mipuiten party hrang hrangte dinhmun an en hian ZPM-ah rinna an nghat hle tih a hriat thu sawiin, "An hruaitute ṭheuh an en hian rinngam tur an zawng a ni. Pu Lalduhoma an zir chianga an ring tawk em em a ni. Pu K Sapdanga pawh hi mi taima rum rut, hlemhletna haw em em mai a ni," a ti.

ZPM Chalfilh West Block buatsaih political training-ah hian ZPM leader Lalduhoma leh working president K Sapdangate pawhin thu an sawi. An thuchhuah tarlan danin, inkhawmah hian an party-ah mithar 159 an lawmlut a ni.