CM hmalakna avangin Mizoramin Hmelthar a hmu zel - MNYF

Mizo National Youth Front (MNYF) chuan thuchhuah siamin, chief minister Zoramthanga hmalakna avangin Mizoramin hmasawnna hmelthar a hmu chho zel nia sawiin, "A lawmawm kan ti," an ti.

Mizoramah kawngpui thar sialna tur cheng vbc. 6,664 pawm a nih thu Ministry of Road Transport and Highways Minister-in a rawn puang tih sawiin MNYF chuan, "He project hlawhtlin theihna tura Pu Zoramthanga hmalakna leh thawhrimna hi a chhuang takzet a ni," a ti a, Mizorama kawngpui thar siamna tur hi km. 204 a sei a nih dawn thu an tarlang.

MNF ṭhalai chuan Covid-19 avanga sum leh pai dinhmun nasa taka a tlakhniam lai leh, hunrei tak chhung hripui lengin min tuam lai pawha Mizoram hmasawnna tura rim taka hnathawk rengtu CM kan nei nia tarlangin, "CM hmalakna avang hian Aizawl by-pass road siamna tur vbc. 500 leh bamboo link road siamna tur vbc. 100 Union Cabinet-in a lo pawh tawh bawk," an ti.

Ram in hunthim leh hunkhirh a tawh laiin ram hruaitu ṭha leh ropui bik an rawn lang ṭhin nia tarlangin MNYF chuan, "Mizoram pawhin hun harsa kan tawh laia ram mipuite tana pa nih tling CM kan nei hi kan vannei hle a ni," an ti a, Zoramthanga chu Mizoram tana a theihna zawng zawng Mizoram tana hlantu niin an tarlang tel a ni.